По 16 пат годинава верници од Битола, Прилеп, Велес и Скопје пеш изодија 25 километри пат во рамки на поклоненичкиот марш „По стапките на нашите предци“ за да се поклонат и оддадат почит на Свети Наум Охридски Чудотворец, голем духовен преродбеник, научник, писател, учител и еден од основоположниците на словенската писменост. Кон маршот се приклучија 48 поклоненици кои пеш ја минаа последната етапа од патувањето од село Царина, Преспа, преку пресеката на планината Галичица, па се̍ до Свети Наум.  

Поклоненичкото патување е во организација на хуманитарната организација „Утешител“ која веќе 16 години го организира во чест на големиот христијански празник посветен на преподобниот Наум Охридски.

Поаѓањето беше вчера, ден пред празникот, во раните утрински часови, патуваа преку ден во временски услови проследени со дожд, но никој од 48 учесници не се откажа од патувањето.

„Тргнавме ден порано, имаше вренежи од дожд, слава му на Бога што вели еден отец имавте кршевање со потпување, сосеме бевме накиснати. Годинава со најголеми искушенија, но најрадосно и најблагодатно. Учествуваа и помали деца, па се̍ до повозрасни лица над 70 години. Патеката не е тешка, пред се е благодатна, кога се оди на вакви свети места, Бог дава сили, голема радост и утеха на душата“, вели Драги Анастасовски, професор по етика на религии.  

Тој додава дека со божја помош ги откриле и оригиналните патишта по кои низ вековите наназад минувале нашите предци.

„Вистинско чудо беше како ги откривме. Откако почнавме да се движиме по нив, осознававме дека биле патеки на нашите предци. Прво сакавме да одиме по асфалт, но потоа постепено се откри целата мапа со божја помош. Ова патување е еден мал љубовен принос, духовна лепта за слава Божја, за Бог преку Свети Наум да даде благослов, мир и радост и спасение на целиот наш народ македонски“, додава Анастасовски.