Вработена од Средношколкиот дом од Битола пријавила во СВР-Битола дека е физички нападната од директорката на домот, Елена Спасеновска. Дознаваме дека директорката е на распит во полиција. 

Од СВР-Битола за Апла.мк официјално потврдуваат дека полицијата интервенирала во Средношколскиот дом, ДУД „Мирка Гинова“ Битола, денеска предпладне.

Денеска по 11 часот, директорката Спасеновска физички ја нападнала вработената - благајничка, пред очите на останати вработени. Бранајќи ја вработената, настрадал и уште еден од вработените кој се здобил со гребаници на рацете. 

„Пријавен е физички напад од страна на вработена во ДУД „Мирка Гинова“ Битола, полицијата постапуваше, излезе на лице место и направи записник Случајот не е затворен, дополнителни информации ќе следат“, потврдија од СВР-Битола, за Апла.мк. 

Елена Спасеновска е кадар на СДСМ, таа воедно е и член на Извршниот одбор на партијата во Битола, во одлучувачкото тело на претседателот Драган Крајовски и секретарот Гордана Анастасовска. 

Апла.мк го запраша Драган  Крајовски, претседател на ОО на СДСМ Битола, дали по неколкуте инциденти во Средношколскиот дом со физички напади врз вработени од страна на претпоставената, и по отворената истрага на ОЈО Битола со сомнежи за злоупотреба на службата, општинската организација на партијата ќе се огради од Спасеновска и дали ќе биде исклучена од ИО?

„Вечарва партијата ќе разговара и ќе одлучува по случајот со Елена Спасеновска, по што ќе имате информација“, потврди Крајовски за Апла.мк

Претходно Крајовски, кога ОЈО влезе во Средношколскиот дом да истражува за евентуален криминал, тој се огради со ОО на СДСМ и кажа дека Просветен инспектор може да иницира разрешување на Спасеновска.

А.Б