Дуќанџиите од Старата битолска чаршија бројат штети од невремето, кое ја зафати Битола овие денови, подрумите им се целосно поплавени, а оштетувања има и на самите објекти. Најголем дел од дуќаните се во влага и мувла. Ѕидовите се во  влага и до еден метар, па зафатени се и производите на полиците. 

-Бевме  во дуќанот во моментот  кога фати невремето, мислев чешма течи кога слегов во визбата видов дека враќа канализацијата. Невреме беше големо река по улици од вода. Сами со кофи до 23 часот вечерта ја црпевме водата од визбата. Вода имаше до колена. Моравме да интервенираме сами за да бидат  помали штетите, вели Павлина Василевска, сопственик на дуќан во Старата чаршија.