Се случи на 14.08.2019 година, ден кога мојот драг пријател и колега Панде Манојлов-познат поет и писател, ми ја пренесе неговата идеја. Пиејќи го заедничкото кафе во кафулето „Равена“ во Битола рече: „ти имаш многу податоци за музиката, музичкиот живот и музичките случувања за Битола вминатото во Битола и пошироко. Убаво е тоа да биде забележено, за поколенијата да разбератат нешто за минатото врзано за таа уметност“. Го прифатив предизвикот за кој сум му јавно благодарен. Ми се допадна и неговата сугестија, сеќавањата да се состојат од наслови за личности и настани со познати имиња од областа на музиката. Некои од повозрасните генерации ќе се препознаат и ќе се потсетат на настаните, а помладите ќе се запознат со случувања за познати и за нив непознати музички личности. На 01.04.2021 година, Кети-мојата другарка од детството ме поттикна да го средам делот од на рака порано напишаните неколку сеќавања, по изминати пет месеци откако Панде Манојлов не е повеќе меѓу нас. Затоа овие неколку напишани редови му ги посветувам нему и на Кети, пишува во предговорот авторот на книгата Слободан Димитров.

Слободан Димитров-Данчо е роден во Битола , во 1945 година. Основното и средното образование го стекна во својот роден град. Го заврши правниот факултет во Белград, а после шест години го положи правосудниот испит. Животот го помина во музичко семејство, со татко-воен музичар. Музичкото описменување го започна во есента 1954 и наредните години, кога во 1960 го заврши Основното музичко училиште во Битола. Виолината му е животен сопатник, како исполнител на сериозна и народна музика. Автор е на неколку музички дела од областа на народниот мелос. Три негови музички творби се во фонотеката на Радио Белград. Добитник е на првата награда од стручното жири на Белградскиот сабор во 1975, за естрадното "Битолчанка оро" изедувано на сите континенти. Адвокатурата му е професија, а музиката е неговата љубов.